Me 20 Tetor 2018, me Ftesë së Kryesisë së Shoqatës Korita Thërret në Bern u mbajt Mbledhja e përgjithshme me anëtarët dhe banorët e fshatit Koritë që jetojnë në Zvicër.

Shoqata ka shënuar rritje të numrit të anëtarësisë, sidomos brenda një viti, duke theksuar se numri i anëtarëve është shtuar për 100%. Përveç manifestimit, këtë vit është organizuar edhe aksioni i parë humanitar dhe se do të realizohet edhe projekti i parë infrastrukturor.

Edhe njëherë u ritheksua se dyert e shoqatës janë të hapura për çdokënd që dëshiron të kontribuoj me idetë dhe mundin e tij.

Për sa i përket manifestimit Korita Feston 2018, u dha mendimi dhe vlerësimi i kryesisë së shoqatës të sjellë nga mbledhja e muajit Shtator.

Manifestimi i vitit 2018 ishte i mirë i mirë organizuar me pjesëmarrje të shumicës së bashkëfshatarëve. Janë evidentuar edhe lëshime gjatë manifestimit të cilat në të ardhmen do të punohet që të mos përsëriten. Manifestimi është mbajtur me të gjitha aktivitetet që janë paraparë më herët.

Falënderojmë për pjesëmarrje edhe Delegacionin e Komunës së Gostivarit, të kryesuar nga Kryetari, z. Arben Taravari.

Shoqata Korita Thërret falënderon komunën e Gostivarit për larjen e rrugëve në brendi të fshatit, vetëm pak ditë përpara mbajtjes së manifestimit Tradicional.

Bashkërisht të gjithë anëtarët theksuan se gjëja më pozitive e këtij manifestimi ka qenë stolisja e binës, si një Odë e improvizuar me gjësende tradicionale nga fshati, si enët, veglat, veshjet, shtresat, zbukurimet dhe sendet tjera. U potencua se nga anëtarët, Bejtulla Nuhiu dhe Nazif Nuhiu shoqatës i’a dhuruan gjësendet të cilat ata i kanë sjellë nga shtëpitë e tyre, me të cilat është stolisur Bina/Oda e improvizuar.

Për diskutim u shtrua edhe Projekti për shtruarjen me pllaka bekatoni të hapësirës përpara varrezave të fshatit. Pasi u dhanë detaje nga kryetari Nazyf Nuhiu, Projekti gjeti mbështetje nga anëtarët e pranishëm dhe u obligua kryesia në Zvicër ta udhëzon anëtarët në Gostivar që projekti të nis të kryhet. Ky projekt do të realizohet nga vet shoqata.

U rikonfirmuan këto VENDIME të miratuara edhe në mbledhjen e kryesisë së Shoqatës Korita Thërret, me datë 22 Shtator

1. Shoqata Korita Thërret distancohet nga çfarëdo fjalim ndarës dhe me mesazhe politike gjatë mbajtjes së manifestimeve, sidomos nga manifestimi i fundit. Shoqata nuk ndanë, ajo bashkon dhe është apolitike.
2. Me çfarëdo institucione, shoqëri, organizata, OJQ, por edhe individë që në të ardhmen do të bashkëpunoj Shoqata Korita Thërret, do të kërkohet që Shoqata jonë të shihet si palë e barabartë, të mos nënçmohet, por edhe të mos nënvlerësohet. Në të kundërtën do të ndërpritet çdo bashkëpunim.
3. Të mbështet projekti për bekatonizimin e hapësirës përpara varrezave të fshatit.

Bern, me 20 Tetor 2018

Koritë/Gostivar, më 29 Korrik 2018

Të dielën e fundit të Korrikut, në fshatin Koritë të Gostivarit u mbajt manifestimi i pestë Tradicional KORITA FESTON 2018.

Qindra karitas, vendali, të shpërngulur në vendbanime tjera të Gostivarit dhe Tetovës, mërgimtarë të migruar nëpër Europë që janë me rrënjë dhe origjinë nga ky fshat, sot erdhën përsëri në Koritë, në vendin dhe manifestimin e vetëm festiv.

Për manifestimin mbi pesë orësh, u përkujdesen Shoqata Korita Thërret me seli në Bern të Zvicrës dhe Dega e Gjermanisë me seli në Hamburg, dega e vendlindjes, por edhe me mbështetjen dhe kontributin e vendasve.

Vajza nga Karita të veshura me Anteri dhe Tërlik e prezantuan veshjen e vjetër dhe shumë të veçantë për vajza/gra që e ka ky fshat. Skena (Oda e improvizuar) u stolis dhe u n’vesh me gjësende origjinale nga fshati Koritë, si Flamuj Kombëtar, Shjylyma (Qilma të ndryshëm), Kalçin (Çorapë) për gra dhe burra, Sofra pi druni, sofrabez, Lugë prej druni, Shtobmë, Vorbë dhe Çanak prej bote, M’ti prej druni, Z’bue leshi për burra, Breza, Llambë me Neft/Gaz, mjetet për Razbue (drugëza).

“Qëllimi i këtij takimi si edhe i takimeve të kaluara, është të ruajmë trungun dhe shpirtin e Koritës dhe Koritasve. Kjo është shumë e rëndësishme në ditët e sodit kur popullata jonë është e shpërndarë në të gjitha anët e botës. Na gëzon fakti që ky Manifestim dhe iniciativa të tilla përkrahen çdo vit e më shumë nga Bashkatdhetarët tanë, kudo që ndodhen ato”, tha në fjalimin hyrës kryetari Naxyf Nuhiu. Ai u ndal edhe të themelimi i degës së shoqatës në Gjermani dhe mundësinë që çdo koritas me idetë dhe përkrahjen e tij mund ta ndihmon shoqatën dhe manifestimin.

“Kjo tregon që Ne të gjithë se bashku kudo që jemi, kemi një qëllim dhe ai është ta ndihmojmë Koritën dhe Koritasit, t’i afrojmë ato, ta njohim mirë njëri tjetrin, t’i ndihmojmë njëri tjetrit. Gjithashtu dua të theksoj se çdonjëri që ka ide apo dëshirë të kontribuoj në organizimin e këtij manifestimi, është i mirëseardhur. Nuk diskutohet se mund të kemi edhe lëshime dhe gabime, por shpresojmë që në të ardhmen të gjithë së bashku t’i tejkalojmë ato”, tha në fund kryetari i Shoqatës Korita Thërret, Naxyf Nuhiu.

Për ta nderuar institucionin e Komunës dhe Kryetarit të Gostivarit, i ftuar për të marr pjesë dhe për të mbajtur fjalë ishte edhe kryetari, Arben Taravari.

“Ju përuroj për këtë organizim të mirëfilltë, sot. Ndjehem shumë krenar dhe ndjehem sikur në shtëpinë time. Gjithsesi se ky është regjion i Gostivarit, Ne jemi bashkë dhe shpresojmë që së bashku me Ju të mundohemi që sa të mundemi t’i mbajmë së paku ata njerëz që janë në Koritë, të cilët jetojnë. Ne si administratë e komunës do mundohemi që të jemi krahu Juaj. Ju faleminderit shumë për ftesën dhe sa më gjatë të organizohet ky Manifestim, vite më radhë kështu ta organizoni”, tha kryetari i komunës së Gostivarit, Arben Taravari.

Manifestimi më pas vazhdoi me programin kulturorë dhe artistik, fillimisht me Valle me motive tradicionale, nga Shoqata Kulturore Artistike “Jahi Hasani” nga Çegrani, pastaj Këngë popullore nga këngëtari i mirënjohur gostivaras, Qatip Selimi, më pas me Kavalle nga instrumentistet e mirënjohur nga Gostivari, Rizvan Sinani dhe Salla Shabani.

Curlet dhe Tupanët i dhanë jehonë fundit të takimit Tradicional, ku fillimisht u luajtën Valle me motive nga dasmat e fshatit Koritë dhe më pas bashkë banorët si “krushqit” nëpër dasma vërshuan rrugët kryesore të fshatit, për t’u rikthyer më pas prapë në vendin edhe ku nisi dasma, te stadiumi i fshatit.

Dreka Tradicionale u shtrua në fund të Manifestimit, në bashkëpunim edhe me Kuzhinën Vita Abi nga Gostivari.

Përgatiti: Kasam Selimi

Hamburg, më 1 Korrik 2018

Të dielën në Hamburg të Gjermanisë, mërgimtarët nga Korita e Gostivarit e kanë themeluar degën e Shoqatës Korita Thërret.

Me Datë 3 Shkurt në Bern, Kryesia e Shoqatës Korita Thërret mbajti mbledhjen e parë për vitin 2018 me anëtarët, njëherit banorët e fshatit Koritë që jetojnë në Zvicër.

Mbledhjen e udhëhoqi Kryetari, z. Naxyf Nuhiu ku i njoftoi të pranishmit me aktivitetet që i ka ndërmarr kryesia e re që prej Dhjetorit të vitit të kaluar. z. Nuhiu falënderoi të gjithsecilin për punën dhe mbështetjen ofruar shoqatës.

Arkëtari z. Reshit Emini raportoi për gjendjen financiare të Shoqatës dhe tha se shoqata është në gjendjen më të mirë që prej themelimit.

Kryesia e Shoqatës KORITA THËRRET në Zvicër, në përbërje të plotë mbajti Mbledhjen e parë pas Organizimit të Manifestimit Tradicional KORITA FESTON 2017.

Në përgjithësi Manifestimi i mbajtur me 30 Korrik të Vitit 2017 është vlerësuar i mirë, sigurisht mundësi për tu përmirësuar dhe pasuruar me aktivitete dhe programe tjera në vitet e ardhshme.

Kryesia shpreh publikisht Falënderime dhe Mirënjohje për të gjithë Anëtarët, Mbështetësit dhe Përkrahësit e Shoqatës Korita Thërret, të cilët mundësojnë që të mbahet Manifestimi Tradicional dhe të krijohet një fond që do të shfrytëzohej në dobi të fshatit Koritë.